Komite Festival Kreol in devwal nouvo lafis pour sa 37enm edisyon ki pe deroule depi Lendi 3 Oktob ziska Lendi 31 Oktob.
Sa lafis ti ganny devwale par artis renonmen Urny Mathiot pandan en konferans lapres ki’n fer kot Sant Konferans Enternasyonal ozordi bomaten.
Msye Mathiot in dir ki son konsep sete pour anmenn en fanmiy kreol avek tou ras e kouler kot nou sorti e vwar sa latmosfer otantik.
I ti osi azoute ki sa travay i demontre bann diferan aktivite dan kad sa Festival Kreol tel ki lanmes kreol e Fon Lanmal, e menm Batenm poupet.
“Sa lafis i demontre lafors e kapasite artis lokal ki kapab montre zot talan, kapabilite e leksperyans,” I dir.
“Nou vwar ki artis i kapab prodwi bann travay ki a la oter e lo menm nivo bann artis enternasyonal. Artis lokal i vreman annan talan e mwan mon’n ganny sa loportinite ki mon’n servi e mon’n prouve ki mon kapab delivre konman en artis lokal.”
Msye Mathiot ti osi remersi fotografer Marsha Dine ki’n osi travay lo sa proze.
