Lazournen Enternasyonal Lalang Maternel
Ozordi, le 21 Fevriye, i fer 23 an depi ki UNESCO in deklar sa dat konman Lazournen Enternasyonal Lalang Maternel. Bi sak lazournen se pou envit bann Leta Manm pou reafirm zot langazman pou protez e promouvwar diversite kiltirel ek lengwistik pour bann sosyete dirab rekonnet valer, benefis ek defi bann lalang lokal oubyen natif dan devlopman en pei.
Diran sa selebrasyon, mon envit zot pou reviv zot lanfans. Lo zenou zot manman, dan zot lantouraz, dan zot zwe toulezour. Dan kouk kasyet zot i’n aprann kont enn de trwa, ou’n pare. Enn de trwa mon pe al dan bwa, bann pti kontin zot i’n sante dan zot lalang maternel. Vwar osi ki mannyer nou lalang maternel i konekte nou, ekip nou e ed nou pou eksprim nou bann lemosyon avek lezot.
Sak selebrasyon, sak lazournen e sak lannen i kouronnen par en tenm. Sa lannen sa tenm i envit nou pour itiliz teknolozi dan laprantisaz miltileng; rekonnet bann defi ek loportinite ki teknolozi i anmennen. Sa i moman pou nou diskit rol potansyel teknolozi pou fer progrese ledikasyon miltileng e soutenir devlopman en lansennyman ek laprantisaz de kalite pour tou.
Teknolozi i kapab ede relev tou bann defi dan ledikasyon e dan lezot sekter nou lekonomi. I kapab akseler zefor vizan bann posibilite laprantisaz ekitab e enkliziv pour tou dimoun. Lalang maternel i sa lakle enklizyon dan tou domenn lavi; sosyal, ekonomik, kiltirel, edikasyonnel, politik e literer.
En sosyete miltileng i egziste atraver bann lalang ki an retour transmet bann savwar kiltirel, kiltir tradisyonnel, e literatir oral, dan en fason dirab. Dan tou nou parkour, annou rekonnet ki lalang pa zis en zouti pou kominik transmisyon ek konesans, me osi en karakter fondamantal lidantite kiltirel ki ekip bann endividi ek bann group.
