Mesaz Sekreter Zeneral David André pour Lazournen Enternasyonal Lalang Maternel

‘Ledikasyon miltileng, en nesesite pour transform ledikasyon’

Bann lazournen enternasyonal obzerve par Nasyon-z-ini ek son bann lenstitisyon spesyalize, i annan pour bi souliny bann laspe enportan lavi imenn ek listwar. I lokazyon osi pour bann pouvwar piblik ek sosyete sivil organiz bann aktivite sansibilizasyon e pour mobiliz bann resours.

Sak lazournen enternasyonal i reprezant en loportinite pour enform gran piblik lo bann tenm ki lye avek bann size mazer parey bann drwa fondamantal, devlopman dirab oubyen patrimwann.  Pour kapab realiz sa, ledikasyon i devret ganny vwar koman lakle.

Tenm pour sa 24 yenm edisyon, Lazournen Enternasyonal Lalang Maternel i «ledikasyon miltileng i en nesesite pour transform ledikasyon ».  Lobzektif en tel lazournen i lokazyon pour rekonnet lenpak pozitif bann lalang ek miltilengwism lo enklizyon.  Moman pour promouvwar nou bann lalang nasyonal koman baz pour favoriz solidarite fonde lo konpreansyon, latolerans ek dyalog.

Ledikasyon miltileng i met lanfaz lo sa lalang ki zanfan i metriz byen epi lezot lalang i ganny entrodwir progresivman. Mon demann nasyon Seselwa pour fer en poz e reflesir lo rezondet en tel lazournen e pour zot protez lalang maternel lamazorite Seselwa, ki Kreol, pour anpes son disparisyon.

Nou merit adopte en lapros enklizif, ki vedir nou pa kit personn deryer e transform ledikasyon pour garanti drwa laprantisaz bann endividi tou dilon zot lavi. Sa i akoz konteks mondyal i enn ki kritik e konpleks, i karakterize par bann ; mouvman an mas, bann kriz tel ki resesyon, Kovid 19, linegalite ki pe ogmante ek kriz klimatik.  Pour sirmont sa bann defi, ledikasyon i devret vin en priyorite, pour akseler bann progre ver realizasyon bann lobzektif devlopman dirab.

Bonn fet lazournen lalang maternel zot tou.