‘Lanmizik i’n mon lavi e i mon lavi,’ Charles Lesperance.

En pti son vyolon i akey mwan kot en lakour. Divan i anmenn sa son byen lwen dan larantre. En zoli melodi byen kalm. Anba son lavarang, Tony Charles parey tou dimoun i konn li, i asize anba son lavarang, son vyolon dan son lanmen e sa lase pe fer bann zoli ritm en vals byen glise dan ler.

Charles Lesperance aze 74an, ki en msye tre zantiy, ti envit mwan pour ekout en lot pti morso byen popiler Madanm Karozen, avek son garson Daniel ki ti akonpanny li avek son gitar.

Ton Charles, ti konmans zwe vyolon a en tre zenn az, enspire par son papa e tonton ki ti osi zwe sa lenstriman mizikal.

“Lanmen i konmans lour konmela, me avan pandemi Kovid-19, mon ti zwe dan lotel. Tou mon lavi mon’n zwe lanmizik, pa zis vyolon me osi gitar,” I rakont mwan.

“Lanmizik i’n mon lavi e i mon lavi. Mon’n dir ler mon mor met mon vyolon dan mon lebra.”

Son parkour dan lanmizik ti demar avek Msye Gerard Savy, me apre Ton Charles ti al fer son prop group ki ti apel Bandits, ki ti fer bokou sikse pandan sa letan.

Mon’n zwe avek Msye Morley Esther e Norbert Lepathy e ansanm nou’n zwe pour plizyer lannen dan bokou lotel e menm bal osi, Ton Charles i reviv sa bann memwar.

Sa msye tre talente ti anmenn mwan lo en pti parkour dan son pase, kot mon ti konn plis lo kimannyer i ti aprann zwe vyolon.

“Mon ti aprann zwe vyolon lo bwat dile e baton koko,mon ti aranz sa baton mon ti met difil lalwa, dan pye lalwa. Mon ti grat li e ganny sa difil , se sa ki mon ti servi.”

“Mon premye vyolon mon ti ganny avek mon defen tonton, limenm ki ti enspir mwan ansanm avek mon papa, ler mon ti regard zot pe zwe mwan osi mon ti anvi aprann parey,” Ton Charles i rakont mwan.

Sa vyolon ki ti pour mon papa, mon ti napa drwa tous li. Mon papa ti anmar dan tetdorye e met anpandan. I ti annan son lanmaraz, si ou pran i pour konnen. Be mwan Charles, mon veye ler papa pa la, mon pran mon zwe.”

“Mon’n aprann zwe lo mon menm mwan. Mon’n get tou zot teknik ler zot zwe apre ler papa pa la mon met an pratik lo son vyolon. Prezan en zour ler monn santi mon’n kapab, la mon kriy mon papa e mon dir li les mwan zwe,”

“Papa i demann mwan, be Charles ou konn zwe vyolon ou. Mon dir li wi. Papa i i dir mwan, be mon piti be la si ou pa zwe sa vyolon, ou pou ganny bate. Mon ganny prete en vyolon avek en msye, e mon konmans zwe.”

Ton Charles i dir ki sa zour i ti son tou dimoun. Son talan ti ganny rekonnet, e avek sa pti sirpriz,son papa ti senpleman al lo peron e plere.

E la ki tou ti konmanse pour li, lo en lot nivo. Ton Charles ti konmans akonpanny son papa letan ki i ti al zwe lanmizik e li osi i ti zwe, e apre ler papa ti nepli kapab zwe se byensir Ton Charles ki ti pran labar.

Ton Charles in pas sa konesans dan zwe vyolon avek lezot menm bann zenn ki’n montre gran lentere ki osi enkli enn son garson.

I pran en pti poz, en zwe en lot pti morso pour mwan sa voyaz son garson Daniel i vin akonpanny li avek son gitar. Ou ti a dir ki nou ti dan pti bal kreol.

Ton Charles in menm al zwe dan plizyer bal e in menm vwayaze ziska Djibouti kot in perform bann diferan morso lo son vyolon.

Ton Charles in ne Baie Sainte Anne me son lanfans in pas Anse La Blague kot in dekrir koman enn ki ti enteresan. Apart ki vyolon lo son bwat dile, i ti osi kontan zwe kannet, me ozordi apart ki son vyolon, son pti zarden i son pasyon.

Pandan Festival Lar e Kiliner ki ti deroule lo Praslin wikenn pase, Ton Charles ti resevwar en pti sirpriz. I ti ganny onore koman enn bann pionye dan kiltir lo sa zil.

Mon parkour kot Ton Charles ti enn tre enteresan akoz mon ti menm aprann zwe vyolon

Par Mandy Bertin